Жас келсе – іске

Жастарға қолайлы жағдай жасау, бастамаларына қолдау білдіру – перспективалық дамудың басты көрсеткіштерінің бірі. Бүгін «Ембімұнайгаз» АҚ алаңында «Самұрық-Қазына» АҚ қарасты ұлттық компанияларда қызмет атқаратын 50-ге жуық жас маман бас қосып, бірқатар шараларға қатысты.

Өндіріс жұмыстарымен танысып, бас кеңседе экологиялық тақырыпты кеңінен талқылады. Компанияның жастар кеңесі атқарған жұмыстардан хабардар болып, алдағы жоспарларынан мәлімет алды.

Аталған жиынға қатысушы жас мамандарды бастап келген «Самұрық-Қазына» АҚ қоғаммен байланыс, әлеуметтік еңбек қатынастары және еңбекті қорғау жөніндегі басқарушы директоры Ғибрат Ауғанов жастар бастамаларын қолдаудың зор маңызға ие екенін атаса, «Ембімұнайгаз» АҚ Бас директоры Сәбит Арынов компания құрамындағы 5000-ға жуық маманның 600-ден астамы жас маман екенін жеткізді. «Самұрық-Қазына» АҚ омбудсмені Серікбай Тұрымов бұл секілді кездесулердің жастар үшін серпін беретінін атап өтті.

Кездесуге қатысқан жастар тәжірибе алмасу, біліктілікті молайту бағытындағы бұндай шараларға қатысу жаңа достар табу, мүдделес жандармен кездесу секілді бастамаларға да жол ашатынын айрықша атады.